2016 gott ár í íslenskum kvikmyndahúsum

Íslensk kvikmynd sú vinsælasta á árinu 2016

Á árinu 2016 fóru samtals 1.420.435 manns í íslensk kvikmyndahús og er það aukning um 2,74% frá árinu 2015. Þess má geta að árið 2015 var í fyrsta skipti í fimm ár sem aukning var í aðsókn á milli ára í íslensk kvikmyndahús og hefur hún því aukist í tvö ár í röð, sem er einkar ánægjulegt. Enn er þó langt í land að hún nái metárinu 2009 þegar tæp 1,7 milljón manns fór í kvikmyndahús. Heildartekjur af kvikmyndasýningum í íslenskum kvikmyndahúsum var kr. 1.689.720.455 og er það hækkun upp á 8,9% í tekjum frá árinu 2015. Hver Íslendingur fór 4,27 sinnum í bíó á árinu og enn og aftur eru Íslendingar í hæstu hæðum þegar kemur að bíóaðsókn í heiminum. Heildaraðsókn er sérstaklega góð með tilliti til þess að Íslendingar sátu sem límdir fyrir framan sjónvarpsskjáinn í rúman mánuð um mitt síðasta sumar þegar Evrópukeppnin í knattspyrnu fór fram.

Það er gaman að segja frá því að  vinsælastamynd ársins var Eiðurinn og er þetta í annað sinn á þremur árum sem íslensk mynd trónir á toppnum í íslenskum kvikmyndahúsum. Árið 2014 var það Vonarstræti. Þá má geta þess að Íslendingar komu líka við sögu á vinsælustu mynd ársins 2015, Everest, og var það jafnframt í annað sinn sem sami leikstjóri (Baltasar Kormákur) átti vinsælustu mynd ársins tvö ár í röð, en áður var það James Cameron þegar Avatar var vinsælasta myndin 2009 og 2010. Baltasar hefur í raun fjórum sinnum leikstýrt vinsælustu mynd ársins (Eiðurinn, 2016, Everest 2015, Mýrin 2006 og Hafið 2002).

Tekjur af Eiðnum voru tæpar 64 milljónir og alls komu tæp 47 þúsund manns í kvikmyndahús til að sjá myndina. Næstvinsælust var svo kvikmyndin Suicide Squad með 57 milljónir í tekjur og nýjasta Star Wars myndin, Rogue one, sem var að hluta tekin upp hér á landi, raðaði sér í þriðja sætið með 56,7 milljónir í tekjur. Þess má einnig geta að síðustu tvær Star Wars myndirnar, The Force Awakens (frumsýnd 17. des. 2015) og Rogue One (frumsýnd 16. des. 2016), sem sjá má á listanum hér að neðan, eru þegar upp var staðið tekjuhæstu myndirnar sem frumsýndar voru á viðkomandi ári. Heildarmiðasala á The Force Awakens endaði í tæpum 113 milljónum króna, sem gerir hana að tekjuhæstu mynd sem frumsýnd var á árinu 2015 og annarri tekjuhæstu mynd allra tíma (eða frá því staðfestar mælingar hófust árið 1995). Rogue One er komin í tæpar 68 milljónir og er því strax orðin tekjuhæsta myndin sem frumsýnd var á árinu 2016.

Lista yfir tuttugu vinsælustu kvikmyndirnar á árinu 2016 má sjá hér að neðan. Þess má geta að vinsældum mynda er ávallt raðað eftir tekjum en ekki aðsókn.

Frumsýndar kvikmyndir á árinu voru samtals 179 sem er sami fjöldi og á árinu 2015.  Frumsýndar íslenskar kvikmyndir og heimildarmyndir voru 15 á árinu, sem er tveimur myndum fleiri en á árinu 2015. Eins og áður segir var kvikmyndin Eiðurinn þar langvinsælust en kvikmyndin Grimmd kom þar á eftir með tæpar 17,5 milljónir í tekjur og þar á eftir Fyrir framan annað fólk með rúmar 14,6 milljónir í tekjur. Vinsælasta heimildarmynd ársins var svo Jökullinn logar sem halaði inn rúmar 4,2 milljónir í kvikmyndahúsum í kringum Evrópukeppnina síðastliðið sumar. Samtals var hlutfall íslenskra kvikmynda og heimildarmynda í kvikmyndahúsum 6,6%, sem er aukning frá árinu 2015 þegar íslenskar myndir voru tæp 4,8% af markaðnum.

Vinsælasta kvikmyndin vestur í Bandaríkjnumum var Finding Dory en sú mynd var jafnframt sú áttunda vinsælust á Íslandi. Hlutfall bandarískra kvikmynda í íslenskum kvikmyndahúsum var óvenjuhátt á árinu 2016 eða 90% í bæði tekjum og aðsókn. Á árunum 2014 og 2015 var hlutfall bandarískra kvikmynda í kringum 85%.

*Kvikmynd enn í sýningu svo ekki er um heildartölur að ræða.

**Frumsýnd 2015. Einungis er um tekjur á árinu 2016 að ræða.